Më 14 prill 2025, në Fakultetin e Bujqësisë dhe Mjekësisë Veterinare të Universitetit të Prishtinës, Dekani Prof. Arben Musliu zhvilloi një takim me përfaqësues nga Programi për Menaxhimin e Integruar të Resurseve Ujore në Kosovë (IWRM-K), z. Frank Wiederkehr, znj. Vera Muhaxhiri, z. Riza Hajdari dhe znj. Fatlinda Muqiqi.
Në emër të fakultetit, Dekani Musliu shprehu mirënjohje të thellë dhe ndau një mirënjohje për donacionin e rëndësishëm të Programit IWRM-K, i cili mundësoi instalimin e një Stacioni të ri Agro-Meteorologjik. Ky aset i vlefshëm do të shërbejë si një burim esencial për:
- Hulumtimin dhe zhvillimin e temave për studentë,
- Përdorimin praktik nga studentët e bujqësisë,
- Fermerët, do të kenë qasje në të dhëna të sakta dhe në kohë reale për të mbështetur aktivitetet e tyre të përditshme.
Të dhënat e gjeneruara nga stacioni do të integrohen automatikisht në bazën kombëtare të të dhënave, duke mundësuar shkëmbimin e informacionit me stacione të tjera të menaxhuara nga fermerët në mbarë vendin. Kjo iniciativë bashkëpunuese synon të:
- Pasurojë bazën e njohurive në fushën e bujqësisë,
- Kontribuojë në parandalimin e ndotjes së ujit,
- Mbështesë zhvillimin e modeleve parashikuese për një bujqësi më inteligjente dhe të qëndrueshme.
Programi IWRM-K do të vijojë të mbështesë dhe zgjerojë këtë projekt, duke u angazhuar për krijimin e një zgjidhjeje institucionale të qëndrueshme për menaxhimin afatgjatë të të dhënave bujqësore dhe mjedisore, në funksion të një ekosistemi të avancuar dhe të integruar.
